Меню
16+

Сетевое издание Ахтынского района

11.03.2020 17:59 Среда
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Къайгъусузвал багъишламишдач

Къайгъусузвал багъишламишдач

Жасмина Саидова

Алатай гьафтеда хьайи совещанидал республикадин Кьил Владимир Васильева агьалийри тIебии газ ишлемишунин рекье хатасузвилин истемишунар кьилиз акъудун таъминарунин месэладал фикир желбнай.

Статистикадин делилри ачухарзавайвал, республикада тIебии газ хатасуздаказ ишлемишунин жигьетдай авай гьалар разивал ийиз жедайбур туш. Анжах алай йисан январь-февраль варцара 18 дуьшуьш арадал атанва, абурун нетижада 40 касдиз зарар ганва.

«Эхиримжи дуьшуьш 15-февралдиз Махачкъалада хьана — кьве мертебадин кIвале газ хъиткьинна, нетижада 53 йисан яшда авай дишегьлидал залан хирер хьанва. Бахтуни гъана, кIвали цIай кьунач, тахьайтIа, мусибатдин гьалар арадал атун мумкин тир. Гьар гьикI ятIани, са кар якъин я – газдин хатасузвилин месэладив агьалияр къайгъусузвилелди эгечIзава. Инсанри фикирзава хьи, «газ» гафунихъ галаз алакъалу вири месэлаяр газовикрин жавабдарвилик ква. Гьа са вахтунда хатасузвилин къайдаяр вири ксариз талукь я», — къейдзава «Газпром газораспределение Дагестан» ООО-дин исполнительный директор Ризван Гъазимегьамедова.

Хатасузвал – сифте чкадал

Газдалди таъминардай хел виниз тир хаталувал авайди я. Эгер гзаф квартирайрикай ибарат кIвале яшамиш жезвай са касди газдин тадаракар, мумкин тир нукьсанрин вилик пад кьун патал вахт-вахтунда ахтармиш тавуртIа, арадал атай бедбахтвилин нетижада вири кIвалериз зарар жеда. Газди вичив къайдасузвилелди эгечIун багъишламишдач. И жигьетдай инсанар кьинин асул себебрик акатзава: гум фидай турбаяр ва я маса тадаракар къайдада авачирвиляй кIватI жезвай угардин газдалди зегьерламиш хьун ва яшайишдин кIвалера газдинни гьавадин къаришма хъиткьинун.

Газдин сетар ва тадаракар хатасуз къайдада хьунин асул шартI абуруз махсус (и рекьяй пешекарар тир) карханади вахт-вахтунда технический рекьяй къуллугъ авун я. Гьаниз килигна, кIвалера авай газдин тадаракар газовикрив ахтармишиз тун важиблу я.

КьетIен хаталувал, къейдзавайвал, газдин колонкайри арадал гъизва, гьикI лагьайтIа, абур пешекарар тушир ксари эцигзавай дуьшуьшар тIимил туш. Са ни ятIани и кар вичи ийизва, масада лагьайтIа, къуншидиз теклифзава. Гьа са вахтунда им эсиллагь дуьз рехъ туш.

РФ-дин Гьукуматди 2013-йисан 14-майдиз кьабулай къарардин бинедаллаз (№410), муьштеридив кIвалин ва я квартирадин къене авай газдин тадаракриз технический рекьяй къуллугъ авуниз (ТО ВДГО ва ВКГО) талукь яз кутIуннавай икьрар хьун чарасуз я. Чир хьана кIанда хьи, ихьтин икьрар

тахьуникай муьштеридин кIвал газдалди таъминарун акъвазарунин бине жезва. Вучиз лагьайтIа, эгер иесиди газовикар лазим ахтармишунар авун патал кIвализ ахъай тавуртIа (чакай гзафбуру ийизвайвал), абурун вилик ракIарар агалайтIа, им а касди вичин хизанни, къуншиярни хаталувилик кутунва лагьай чIал жезва.

«Газовикривай, газдин тадаракриз технический рекьяй къуллугъ авунин бинеда вуч ава лугьуз мукьвал-мукьвал хабар кьада. Гьелбетда, и суал гьахълуди я, гьикI лагьайтIа, йис патал кутIунзавай икьрардихъ чна пул гузва», — лугьузва идарадин векилди.

Ада гъавурда турвал, ихьтин икьрардин бинедаллаз, слесарди, куь кIвализ атайла, сифтени-сифте газдин прибордин патав азаддаказ физ жезватIа, газдин турба приборрихъ жуфтдиз галкIурнаватIа, тадаракар авай гьал ахтармишна кIанда. Идалайни гъейри, гзаф квартирайрин ва кьилдин ксарин кIвалерин къецепатан ва къенепатан конструкцийрай тухванвай чкайрал футлярар алатIа, абур къайдада аватIа, турбаяр галкIурнавай чкаяр гьи гьалда аватIа килигда. Газ кузвай тадаракди вири режимра кIвалахзавай жуьре ахтармишда, пичерин горелкаяр кIватI жезвай чиркерикай михьда, кранар алудда ва абуруз ягъ яда. Газдалди таъминарунин кIвалахда дегишвилер хьайила, ам аватоматламишнавай къайдада акъвазарунин тадаракар гьи гьалда аватIа килигда, дуьздаказ туькIуьр хъийида. Гум фидай ва гьава михьи ийидай системада гьавади чIугвадай къуват аватIа, гурмагъдихъ турбаяр галкIурнавай жуьре ахтармишда, абонентдиз яшайишда газ хатасуздаказ ишлемишунин къайдадаяр чирда.

«Кьиле тухванвай ТО ВДГО-дилай кьулухъ муьштериди, эгер и кIвалахар, дугъриданни, тамамарнаватIа, вахкунин-кьабулунин актунал къул чIугун лазим я. Гьа икI инсандивай, кIвал чими ийидай къазан ва я газдин пич себеб яз, чIуру гьалар арадал текъведайдак умуд кутуна, архайинвал ийиз жеда. Инал къейд ийин, винидихъ лагьанвай кIвалахар тамамарунин къиметар гьар жуьрединбур ятIани, екебур туш. Мисал яз, кьуд конфоркадикай ибарат газдин пичиниз технический рекьяй йиса къуллугъ авунин къимет — 330 манат, газдин счетчикдин – 127 манат я. Гьа са вахтунда и кIвалахри куь сагъламвал ва эменнидин саламатвал заминламишзава», — гъавурда твазва Р.Гъазимегьамедова.

Къейд ийин, алай вахтунда РД-дин Кьил В.Васильеван тапшуругъдалди республикадин агьалийрин кIвалера авай газдин тадаракар ахтармишунин кIвалах башламишнава. И кардал МЧС-дин Госжилинспекциядин, газдин ва пожарный къуллугърин векилар машгъул я. Гьаниз килигна, газдин идарадин векилри республикадин агьалийриз ТО-дин икьрарар кутIунунин месэладив жезмай кьван жавабдарвилелди эгечIуниз эвер гузва.

РикIел хуьн важиблу я

Зулунни хъуьтIуьн вахтунда газдин приборри иллаки гужлудааз кIвалахзава. Гьаниз килигна, газдин идарадин къуллугъчийри агьалийривай агъадихъ галай меслятриз фикир гун тIалабзава:

- къайдада авачир газдин приборар ишлемишун къадагъа я;

- газдин пичер эцигнавай чкайриз датIана михьи гьава къведайвал авуна кIанда (проветривать);

- газ кайила, жезвай продукт гурмагъдиз физвай приборар ишлемишдайла, ана (гурмагъда) гьавади чIугвадай къуват аватIа ахтармишна кIанда. Эгер авачтIа, пич ишлемишун къадагъа я. Вучиз лагьайтIа, зегьерламишдай шейэр кIвале гьатун мумкин я.

- газдин пичер авай кIвалер ксун ва ял ягъун патал ишлемишмир;

- кIвалахзавай газдин пичер фикир тагана тамир, абур кIвал чими авун патал ишлемишмир;

- газдин пичерив аялар агудмир;

- приборар пешекаррин куьмек галачиз ремонт ийимир;

- пешекаррин куьмек галачиз кIвалера газдин системаяр тайинармир, турбаяр санай масаниз акъудмир;

- гурмагъар ва гьава михьдай тадаракар, гьакIни галкIурдай патрубкаяр, гурмагърин кьилер авай гьал вахт-вахтунда ахтармиша ва ВДГО-дин ТО тамамарзавай организациядив абур ахтармишуниз талукь актар агакьара;

- кьетIен фикир шиберар (задвижка) авай пичериз це. И алат дуьздаказ ишлемиш тавуни гзаф вахтара бедбахтвилин дуьшуьшрал гъизва.

РикIел хуьх: эгер кIвале газдин ни аватIа, тади гьалда аварийный къуллугъдиз эверна кIанда. Абурув хабар стационардин телефондин — 04, мобильный телефондин 104 нумрадиз, я тахьайтIа къутармишунин къуллугъдин сад тир нумрадиз – 112 — зенг авуналди агакьариз жеда.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4