Меню
16+

Сетевое издание Ахтынского района

20.02.2021 10:28 Суббота
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

«ЛЮМИНАРИДА» – ВЫСТАВКА

Автор: Дашдемир ШЕРИФАЛИЕВ

Дагъустан – им дуьньяда вишелай виниз гьар жуьре халкьарни миллетар къадим заманайрилай саналди гьуьрметлудаказ яшамиш жезвай кьетIен чкайрикай сад я. Гьар са этнос вичин надирвилелди тафаватлу жезва ва гьа са вахтунда абур гьакьван сад-садаз мукьва я. Бубайрилай атанвай тIуьн-хъунралдини алукIдай пек-парталдалди, хийир-шийирдинни ацукьун-къарагъунин адетрин жуьреба-жуьревилелди фаркьлу абуру гьуьрметлу са хизан тешкилзава – дагъустанвияр.

ИкI, ДАССР-дин 100 йисан юбилейдин серенжемрин сергьятраваз 13-февралдиз Ахцегь райондин Хуьруьгрин хуьре, просвещенидин «Люминари» Центрдиз Дербент шегьердай «Девиррин цIиргъ-алакъа» («Нить времён») выставкадин цIийи проект гваз РД-дин культурадин Министерстводин къаюмвилик квай «Дуьньядин медениятрин ва динрин тарихдин музейдин» коллектив атанвай. Февралдин эхирдалди давам жезвай кьетIен выставкадикай ван хьайила, «Люминари» Центрдин залда хуьруьгвийрилай алава, къунши хуьрерай ва Ахцегьай атанвай ксарни авай.

- «Нить времён» проектдин выставкаяр гваз чун Къазан, Астрахань, Грозный шегьерра хьана ва виринра тамашачийри хъсан къимет гуналди кьабулна,- къейдна музейдин директор ва проектдин руководитель Диана Гьасановади. — ЦIийи выставка (адак Кьиблепатан Дагъустандин халкьарин дишегьлийринни итимрин милли парталрин, чи хуьрерин тамашуниз лайихлу бязи чкайринни дагъвийрин эсерлу кьетIен къаматар къалурзавай шикилрин экспонатар ва Кьиблепатан дагъустанвийрин милли парталрикайни лишанрикай суьгьбетзавай, гьакI Кьиблепатан Дагъустандин гуьзелвал къалурзавай документально-художественный фильм ква) гваз гила чун сифтени сифте иниз вучиз атанва лагьайтIа, Ахцегь райондин баркаван чили уьлкведиз илимдинни искусстводин жуьреба-жуьре рекьерай вишералди зурба бажарагъар гана. Кьвед лагьайди, гьукуматди чкадин туризмдиз фикир гузвай вахтунда ина и кар патал вири мумкинвилер ава: кудай дарман ятарин гьамамар, урусрин машгьур къеле, надир мукъвер, музеяр… Абурулайни гъейри, «Люминари» Центр (ам рикIел атана туькIуьрайди сагърай!) – им милли культура, чи халкьарин лап хъсан адетар жегьилрив агакьарун, абур бубайрин баркаллу чешнейралди ватанпересар яз тербияламишун патал девирдин истемишунрив кьур вири шартIарал таъмин лап хъсан майдан я. Кьилинди, къе чна Просвещенидин мергьяматлувилин «Люминари» Центрдин президент, РД-дин лайихлу муаллим Абдулкеримов Магьмуд Абдулжалиловичахъ галаз санал кIвалахунин рекьяй махсус икьрар кутIазва.

Трибунадихъ «Люминари» Цетрдин президент Магьмуд муаллим гала: — Гьуьрметлу мугьманар, мярекатдин иштиракчияр! Къе чаз къадим Дербент шегьердай багьа савкьат-выставка гваз яратмишунин интеллигенциядин чIехи делегация атунал ва Дуьньядин медениятрин ва динрин тарихдин музейдихъ галаз санал кIвалахунин рекьяй икьрар кутIунал чун пара шад я. «Люминари» Центрдиз уьлкведин ва дуьньядин пара пипIерай тежриба къачуз-агакьарунин мураддалди мугьманар къвезва, шаз гьатта яргъал Австралиядайни кваз атанвай. Эхь, им Дагъустанда просвещенидин кьетIен жуьредин сифте Центр я. Ина аялриз, жегьилриз чпин хушуналди кIани рекьяй вини дережадин пешекарривай пулсуздаказ машгъулатрин тегьерда чирвилер къачудай, чпин алакьунар, бажарагъ ачухардай, рикI аладардай ва, кьилинди, гележегдин пеше хкядай надир мумкинвилер ава. Мугьманриз йифиз амукьдай, ял ядай шартIарни яратмишнава.

Хъсан выставка тешкилнавай Дербентдин махсус музейдин коллективдин тIварцIихъ тебрикдин хуш келимаяр гваз трибунадихъай Ахцегьрин тарихдинни край чирдай музейдин директор, РД-дин культурадин лайихлу къуллугъчи Агьмед Дагъларов, райондин культурадин управленидин начальник Къистер Гъаниева ва маса ксар рахана.

Культурадин манадин шад мярекат тамашачияр Кьиблепатан Дагъустандин гуьзел пейзажризни халкьарин адетриз талукь выставкадин таъсирлу экспонатриз ва документальный фильмдиз килигуналди (абур тамашачийриз пара бегенмиш хьана) ва мугьманрихъ галаз мукьувай таниш хьуналди давам хьана.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1