Меню
16+

Сетевое издание Ахтынского района

20.08.2020 11:26 Четверг
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

АХЦЕГЬАР ВУЧИЗ ЗИРЗИБИЛРИКАЙ МИХЬИЗ ЖЕЗВАЧ?

Ражаудин СУЛЕЙМАНОВ

Зирзибилар хутахунин месэла Дагъустан патал хцибурукай сад хьанва. И рекьяй райцентрдани гьалар хъсан туш. Ина куьчейра ящикар зирзибилрив ацIанва, инал-анал ТБО-дин ихтиярсуз майданар арадал къвезва. И кардин себеб, эвелимжи нубатда, чи инсанрин къайгъусузвал, меденисузвал я.

Исятда чина гзаф мехъерар ава. Абурук иштиракиз Ахцегьиз мугьманвилиз маса чкайрай, гьатта къецепатан уьлквейрайни инсанар хквезвай вахтунда им беябурчивилин кар хьанва. Са патахъай чна райондиз туристар желбуникайни фикирзава, муькуь патахъай, общественный чкайра михьивал хуьз жезвач. Важиблу и месэла са шумудра чи газетда къарагъарнатIани, гьайиф хьи, ам сакIани гьялиз жезвач. Аллагьдиз шукур хьуй, эхиримжи йикъара гьалар хъсанвилихъ дегиш жезвай хьиз я.

Вучиз чи хуьрер зирзибилрикай михьиз жезвач? — и суал эцигна чна бязи жавабдар къуллугъчийрин вилик мукьвара.

Низами Эфендиев, «Сельсовет Ахтынский» СП-дин кьил: — Зирзибилар хутахунин гьакъиндай татугай гьалар тек са чина ваъ, саки вири республикада ава. Тахсиркарни и месэла вичин хиве кьунвай «Экологи-ка» компания я. Абурун везифа инсанривай пул кIватIна, зирзибил хутахна тергдай къайда туькIуьрун я. Чи патай ГСМ-дин, транспортдин куьмек гайилани, абурувай чпин везифаяр кьилиз акъудиз жезвач. Алай вахтунда абур чи райондиз гзаф буржлу я.

Гьелбетда, и месэлада «Экологи-ка» карханадихъ галаз санал Ахцегьрин жемятни тахсирлу я. Аквазва, ТБО хутахзавач. ЯтIани, гуя хъилерай хьиз, вуч хьайитIани кIваляй акъудиз куьчедал гадарзава. «Экологи-ка»-ди гьи жуьредин зирзибил хьайитIани хутахзавач эхир. Куз жери шейэр кана, ктIидайбур са таран дибда, фура туртIа, куьчеяр икьван кьацIудач.

И мукьва райондин руководство зирзибилар хутахдай «Экологи-ка» ООО-дин векилрихъ галаз гуьруьшмиш ва адан цIийи директор Миргьасан Гьамзаевахъ галаз таниш хьана. Кьиле фейи совещанидал зирзиблдин месэла гьялдай рекъер веревирдна. Чи фикирдалди, «Экологи-ка»-дин цIийи директор жавабдар кас я, ва месэла гила гьялиз жеда.

Райцентр зирзибилрикай михьунин месэладин гьакъиндай райондин Общественный палатадин председатель Али Исмаилова ингье вуч лугьузватIа:

Виликдай чна райондин бюджетдин такьатрин гьисабдай зирзибилрин месэла гьялиз гзаф вахт тир. Гила Гьукуматди муниципалитетриз ва хуьрерин поселенийриз зирзибилрин месэла гьялуниз гьич са манатни харж ийиз ихтияр гузвач. И рекьяй вири крар пудратчийрин хиве тунва. Дагъустанда зирзибилар хутахдай пудратчи ООО «Экологи-ка» я. И карханадивай вичин везифаяр тамамариз жезвач, гьавиляй чина зирзибилриз талукь яз татугай гьаларни арадал атанва.

Исятда чун зирзибилрин бакриз килигайтIа, анра авачир са затIни авач. Абурай гьаятдай акъудай накьварни, векьерни маса затIар аквада. Ибур вири цIай яна куз ва миянардай затI хьиз ишлемиш жеда. Жемятди вири крара гьамиша са вуж ятIани тахсирлу ийизва, амма чна гьар сада месэла вичелай башламишна кIанда. За чи агьалийривай медени хуьн, зирзибилар кьилди-кьилди авуна, чIур тежедай затIар тадиз гадар тавун тIалабзава.

Разивилелди лугьун, винидихъ къейднавай совещанидалай кьулухъ чи куьчеяр яваш-яваш зирзибилрикай михьзава. Умудлу я хьи, «Экологи-ка» компаниядин цIийи директор чи районэгьли Миргьасан Гьамзаева и кIвалах намуслувилелди кьиле тухуда. Райондин талукь тир идараярни адаз алакьдай вири куьмекар гуз гьазур я.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

16