Меню
16+

Сетевое издание Ахтынского района

28.07.2020 16:16 Вторник
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

РЕСПУБЛИКАДИН КУЬМЕК КВАЧИЗ ТIЕБИАТДИН БЕДБАХТВИЛЕР АЛУДИЗ ЖЕЗВАЧ

Дашдемир ШЕРИФАЛИЕВ

ТIебиатдилай зурба художник, архитектор авач ва якъин адан хура акъвазизни жедач. ТIебии къуватри ара-ара чилин акунар вичиз кIанивал дегишарда…

И мукьва, 21-22 лагьай июндиз, яргъал чIугур къати марфар къуникди Ахцегь районда вацIар хкаж хьана, кIамарай гурлу селлер атана. Нетижада халкьдин майишатдиз аквадай хьтин

зарар хьана. Кьилди къачуртIа, республикадин Мегьарамдхуьр-Усугъчай-Ахцегь-Рутул автотрасса 4-5 сятда кардикай хкатна (энгел тавуна залан техника желбуналди рехъ ачухнатIани, гилани къванер аватунин хаталувал ава). Ахты-чай вацIун дереда Фияз, Гутумиз, Хинез фидай рекьер са шумуд чкадилай ацахьна. Хинерин хуьруьн муьгъ тухуникди 2 агъзуралай гзаф агьалияр яшамиш жезвай дагълух хуьр «чIехи чиликай» тамамвилелди хкатна. Райцентр ва мад 5 хуьр (районэгьлийрин 80 %) хъвадай целди таъминарзавай «Лекье-дере — Ахцегь» цин проводдин кьилин имарат ремонтиз техжер тегьерда чкIана ва икI мад.

Гьа юкъуз кьиле муниципалитетдин кьил Осман Абдулкеримов аваз КЧС-дин комиссиядин заседание эверна ва республикадин руководство, гьакI Дагъустандин МЧС-дин ГУ, транспортдинни рекьерин майишатдин Министерство хабардарна. Гьа са вахтунда паталай къведай куьмекдал вил алаз акъваз тавуна, районди вичин хсуси къуватралди 68 километрдин рекьер селлерикай михьи хъувуна, Цуругърин ва Хуьруьгрин хуьрериз рехъ ачухна.

Цин проводдин кьилин имаратдин, Ахты-чай вацIун дередин ва вацIу тухванвай Хинерин муькъуьн гьалар чкадал ахтармишун патал анриз махсус комиссия ракъурна. Адан гьисабрай, райондин экономикадиз тахминан 5 миллион манадилай гзаф зарар хьанва. Гьукуматдин куьмек квачиз бязи рекьерин участокар, цин проводдин кьилин имарат ва Хинерин муьгъ туькIуьр хъийиз жедач. Идан гьакъиндай «Ахцегь район» МР-дин кьил О.М.Абдулкеримован къул алаз РД-дин Правительстводин Председатель А.А.Здуноваз чар ракъурнава. Районэгьлийрин вил республикадин куьмекдал ала.

Месэладин гьакъиндай 25-июлдиз Ахцегь муниципалитетдин кьил Осман Абдулкеримован регьбервилик кваз райондин КЧС-дин гегьенш заседание хьана. Адан кIвалахда райондин са жерге идарайринни карханайрин руководителрилай ва СП-рин кьилерилай алава, РД-дин Халкьдин Собранидин депутат Рафик Асланбегова, райсобранидин председатель Абдулкерим Палчаева иштиракна.

ТIебиатдин бедбахтвилерин нетижаяр вахтунда алудунин жигьетдай «Лекье-дере — Ахцегь» цин проводдин кьилин имаратдал фена хтанвай райадминистрациядин кьилин заместитель Роберт Гьамзаеван, ГО ЧС-дин ва ЕДДС-дин Управленидин начальник Мегьамед Моллалиеван, УЖКХ-дин руководитель Фиридин Магьмудован ва эцигунардай Управленидин (УСЕЗ) начальник Сердер Моллалиеван малуматрихъ яб акалайдалай кьулухъ О. М. Абдулкеримова УЖКХ-дин руководителдални Самур дередин СП-рин кьилерал цин провод кардик ахкатдалди жемят, машиндалди гъиз, хъвадай целди таъминарун тапшурмишна. И кар патал анал цин махсус графикни тайинарна. Алай вахтунда цин кьилин имарат ремонтунив эгечIзава.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3